Binigyang buhay ng Batangas Provincial Blood Council ang temang “ Blood Connects Us All” sa ginanap 8th Sandugo Awards noong ika-27 ng Hulyo 2016 sa Batangas City Convention Center.
Ang Annual Sandugo Awards ay isang programang hatid ng Pamahalang Panlalawigan ng Batangas na nagbibigay pagpupugay at pasasalamat sa mga blood heroes o active partners sa blood donations sa buong lalawigan.
Naging pangunahing panauhin sa programa si Batangas Governor Hermilando I. Mandanas na taos-pusong nagpasalamat sa lahat ng nakilahok sa adhikain ng Provincial Blood Council.
“Dapat sa inyo ay binibigyan ng parangal araw-araw sapagkat araw-araw ay may isang buhay na nangangailangan ng inyong dugo,” ito ang unang salitang binitawan ng Gobernador sa harap ng mga blood heroes. “ Hindi tulad ng pera, na pwede nating makuha kung saan, ang inaalay niyo dito ay bahagi ng inyong buhay,” dadag nito.
Binigyan-diin ni Governor Mandanas na dapat isa -puso at isa-isip ng bawat Batangueño ang dakilang adhikaing ito, bilang pagpapakita sa buong bansa na simula pa noon, kilala ang Batangas bilang isa sa mga naunang lalawigan na nag-alay ng dugo sa pag-aaklas sa mga mananakop.
Kinilala sa okasyon ang mga itinayong blood councils na binubuo ng mga aktibong indibidwal at grupo na kinabibilangan ng non-government organizations, community organizations, local government units, academe at business organizations .
Sa hanay ng mga Local Government Units na mga pangunahing partners ng blood collection program, nanguna sa Top Ten ang Lungsod ng Lipa para sa taong ito, at sinundan ng mga bayan ng Calatagan, Cuenca, San Juan, Batangas City, Alitagtag, Malvar, Tanauan City, Taysan at Balayan.
Tinangahal na naman sa Top 5 Performing Blood Collectors para sa private and public sectors partners ang Lyceum of the Philippines University-Batangas MLS Dept. Atlantic Gulf and the Pacific; LPU-Batangas CITHM; Cancer Warriors Foundation at ang Philippine National Police.
Sa taong ito, binigyang pagkilala ang kabuuang 549 donors mula sa Local Government Units, Private Companies, at Academe.
Dahil dito, umabot sa 120% rate ang koleksyon ng Provincial Blood Council, daan upang makamit ang target na mapagsilbihan ang higit na 1% na kabuuang populasyon ng lalawigan.
Ipinagbigay alam ni Governor Mandanas ang paglalaan ng paunang P1M piso para sa mga nakalatag na programa ng Blood Council, na nakatutok sa pag-angkat ng mga kaalaman at teknolohiya. Magiging katuwang ito ng nakatakdang pagdating ng dalawang Blood Refrigeration Units sa lalawigan, sa pamamagitan ng Philippine National Red Cross-Batangas, at Batangas Medical Center.
Batangas PIO/ Edwin V. Zabarte