Lakan at Lakambini ng Batangas 2019, kinoronahan

September 17, 2019

Kinoronahan bilang Lakan at Lakambini ng Batangas 2019 sina Francis Benjamin Jalando-On ng Lemery at Jennybelle V. Colona ng Agoncillo, sa pageant at coronation night na isinagawa sa DREAM Zone, Capitol Compound, Batangas City noong ika-14 ng Setyembre 2019.

Ang Lakan at Lakambini ng Batangas 2019 search ay tampok na proyekto ng Sangguniang Kabataan (SK) Batangas Provincial Federation, sa pangunguna ni federation president at Sangguniang Panlalawigan (SP) Board Member Louise Vale.

Labing anim na Lakan at labing-limang Lakambini mula sa iba’t ibang bayan at lungsod sa probinsya ang nagtagisan ng ganda, galing at talent. Mula sa mga nasabing kalahok, pumili ang mga hurado ng Top 7 winners.

Itinanghal ding winners sina Eudisia Quilao ng Tanauan City, at Jay Tom Francis Bughao ng Bauan (1st Runner Up); Stephanie Jane Sabili ng Lemery, at Alfredo Martin V. Magbuo ng Taal (2nd Runner Up); Aira Moreen L. Marasigan ng Taal, at John Lexer G. Ibita ng Tuy (3rd Runner Up); Kiana Mari B. Castillo ng San Pascual, at Mel John Madronio Carcido ng Lipa City (4th Runner Up); Bea Gamboa Ramirez ng Lipa City, at Albrecht Yhuanie Pring ng San Luis (5th Runner Up); at, Yna Bianca Maulion ng San Luis, at Jobert A. Macayanan ng Tanauan City (6th Runner Up).

Nagpahayag ng kasiyahan at pasasalamat si BM Vale sa lahat ng mga taong tumulong at sumuporta sa patimpalak, kabilang sina Gov. DoDo Mandanas, Vice Governor Mark Leviste at SP Board Members.

Naging panauhin naman sa coronation night sina Vice Governor Leviste, 3rd District Board Member Rudy Balba, Scholarship Head Mrs. Merlita Pasatiempo, at mga SK Presidents ng bawat bayan at lungsod sa lalawigan.

Junjun Hara De Chavez – Batangas PIO