August 24, 2017
Muling napatunayan ang husay at sipag ng mga bumubuo ng Batangas Provincial Disaster Risk Reduction and Management Council (PDRRMC) nang magawaran ito ng 1st Place sa kategorya ng Best Provincial Disaster Risk Reduction and Management Councils sa buong CALABARZON Region sa 2017 Gawad Kalasag Awarding Ceremony na ginanap sa Development Academy of the Philippines, Tagaytay City noong ika-24 ng Agosto 2017.
Kaugnay nito, nahirang namang Best Provincial Disaster Risk Reduction and Management Officer si Mr. Joselito M. Castro sa Region 4A.
Sa pamamagitan ng nasabing awards, kinilala ng Office of Civil Defense at Regional Disaster Risk Reduction and Management Council – CALABARZON ang ipinamalas na kahusayan ng Batangas Province sa Disaster Risk Reduction Management at climate change adaptation, na ginagabayan ng mahusay na pamunuan na nakahandang mamuhunan para sa mga kritikal na pangangailangan ng konseho para sa agaran at wastong serbisyo publiko.
Ito ang ikalawang pagkakataong nakamit ng lalawigan ang nasabing award na nagpapakita sa tuloy-tuloy na magandang pagpapalakad ng PDRRMC, sa pangunguna ni Gov. Dodo Mandanas at PDRRMO chief Lito Castro. Binigyang-diin sa nasabing gawad na ang Batangas PDRRMC ay kaisa ng CALABARZON DRRMC sa pagpapatupad ng pambansang bisyon na “Safer, adaptive and disaster-resilient Filipino communities towards sustainable development.”
Naging kinatawan ng Batangas PDRRMC na tumanggap ng pagkilala sina Acting Governor Nas Ona, Provincial Engineer Gilbert Gatdula at Ms. Adel Macaraig ng Provincial Social Welfare and Development Office. Vince Altar – Batangas Capitol PIO