2022 Outstanding Nutrition Program Implementers ng Batangas Province, Binigyang-pagkilala ng Pamahalaang Panlalawigan

August 3, 2023

Binigyang-pagkilala ng Pamahalaang Panlalawigan ng Batangas, sa pangunguna ni Gov. DoDo Mandanas at sa pangangasiwa ng Provincial Health Office (PHO), ang mga huwaran sa pagpapatupad ng mga programa sa nutrisyon, kasabay ng isinagawang selebrasyon ng 49th Nutrition Month nitong Lunes, ika-31 ng Hulyo 2023, sa Regina R. Mandanas Memorial DREAM Zone, Capitol Compound, Lungsod ng Batangas.

Mula sa 34 na bayan at lungsod, itinanghal ang Pamahalaang Bayan ng San Jose, na pinamumunuan ni Mayor Valentino Patron, na tumatayo ring Municipal Nutrition Committee Chairman, bilang Provincial Outstanding Municipal Nutrition Committee. Sinundan ito ng bayan ng Alitagtag at Taysan bilang first at second runner up, ayon sa pagkakabanggit.

Para naman sa local nutrition focal points (LNFPs), tinanggap nina Edwina L. Cantos ng San Jose ang titulong Provincial Outstanding Municipal Nutrition Action Officer at Elsa M. Mauleon ng Cuenca ang Provincial Outstanding Municipal/City Nutrition Program Coordinator.

Ang Provincial Outstanding Barangay Nutrition Committee ay iginawad naman sa Brgy. Salvador Agito sa Bayan ng Alitagtag kung saan nanunungkulan si Salome A. Magpantay na siya namang Provincial Outstanding Barangay Nutrition Scholar.

Kasabay nito, isinagawa ang 2023 Provincial Awards for Nutritionist-Dietitians kung saan hinirang bilang Most Outstanding Nutritionist-Dietitian si Reina L. Lizardo ng Don Manuel Lopez Memorial District Hospital, Outstanding Nutritionist-Dietitian si Hannah Coleen R. Capul ng Apacible Memorial District Hospital, at Distinguished Nutritionist-Dietitian si Maria Princess C. Mendoza ng Lobo Municipal Hospital.

Samantala, pinangunahan ni Gov. Mandanas ang panunumpa sa katungkulan ng mga opisyal ng Provincial Federation of City/Municipal Nutrition Officers at Provincial Federation of Barangay Nutrition Scholars.

Nakiisa rin sa aktibidad sina Vice Gov. Mark Leviste, mga Board Members ng Sangguniang Panlalawigan, at Anakalusugan Representative Ray Florence Reyes.

Gian Marco Escamillas / Photos by Junjun Hara De Chavez – Batangas Capitol PIO