October 20, 2017
Inilatag ng Provincial Veterinary Office ang kaukulang training workshop para sa mga kasapi ng Provincial Avian Influenza Task Force noong ika-10 at 11 ng Oktubre 2017 sa Southern Tagalog Integrated Agricultural Reseach Center sa Lungsod ng Lipa.
Kabilang sa mga napili at inatasang dumalo sa pagsasanay ang mga Municipal Agriculture Officers, mga opisyales ng Batangas PNP, mga kinatawan at stakeholders ng livestock and poultry industries sa lalawigan at 60 miyembro ng binuong Avian Influenza Provincial Task Force.
Tinalakay sa pagsasanay ang mabilisan at epektibong paghahanda ng Avian Influenza Preparedness Plan, pagtatalaga na mga miyembro na tututok sa risk and crisis communication sa oras na dumating ang avian influenza o Bird Flu at ganun na rin ang mga operational procedures na ipatutupad sa pagsasagawa ng mass depopulation ng mga manok upang maiwasan ang malawakang pagkalat nito sa oras na ito ay tumama sa Lalawigan ng Batangas.
Isinagawa din sa pagasasanay ang review ng status and overview ng Avian Influenza situation sa bansa, at pagsasa-ilalim sa mga napiling kalahok sa table top simulation and risk crisis management workshop.
Ang pagsasanay ay pinangunahan ng mga opisyal ng Provincial Veterinary office e na pinamumunuan ni Dr. Romelito Marasigan, Provincial Veterinarian, Dra. Irenea manuel, Dr, Ronnie Domingo, Dra. Annierica Lajarca, Dra. Gloria Salazar, Dr. Samuel Castro at Dr. Bong Bucad.
Ayon sa mga opisyal ng ProVet, ang pagsasanay na ito ay napapanahon at lubos na kailangan upang masiguro na ang unang hakbang upang mapigilan ang bird flu ay agarang maisakatuparan sa oras na ito ay tumama saan mang parte ng bansa at masiguro na hindi ito makarating sa lalawigan.
Matatandaan na noong buwan ng Agosto 2017, nagkaroon ng bird flu outbreak sa mga lalawigan na nasa northern at central Luzon, daan upang magpalabas ang lalawigan ng Avian Influenza Provincial Advisory No. 17-001 na nilagdaan ni Batangas Governor Dodo Mandanas na nagtatakda ng mga alituntunin at regulasyon upang maprotektahan ang livestock industry ng Batangas. / Batangas Capitol PIO -Edwin V. Zabarte