May 5, 2020
Bukod sa pagpapatupad ng social distancing, pagsiguro sa pagsusuot ng face mask, at palagiang paggamit ng alcohol o hand sanitizer, isa ang pag-disinfect sa mga pampublikong pamilihan bilang patuloy na ginagawang hakbang ng bawat bayan at lungsod sa Lalawigan ng Batangas upang mapigilan at tuluyang masugpo ang Coronavirus Disease o COVID-19.
Ito ay bahagi na rin ng pagtiyak na mapanatili ang kalinisan sa isa sa mga ikonokonsidera na mataong lugar o madalas pinupuntahan sa ating mga komunidad.
Sa kasalukuyan ay maraming public markets na sa buong lalawigan ang tuloy-tuloy na isinasailalim sa disinfection drive. Kabilang dito ang Rosario Public Market na sa katunayan ay wala pang naitatalang kaso ng COVID-19.
Kasama rin ang Taal Public Market kung saan iisa lamang ang naitatala pang confirmed COVID-19 case.
Samantala, sa pagsasagawa ng disinfection operation sa mga pamilihan, tinitiyak naman na ligtas sa mga tao ang ginagamit na solution upang hindi ito makapagdulot ng anumang problemang pangkalusugan.
Batangas PIO