Nationwide Information Caravan para sa RA 10931, Isinagawa sa Batangas

June 20, 2018

Sa pangunguna ng Unified Student Financial Assistance System for Tertiary Education (UniFAST), katuwang ang Commision on Higher Education (CHED), isinagawa ang isa sa serye ng Nationwide Information Caravan sa Batangas City Convention Center, Batangas City noong ika-19 ng Hunyo 2018 para ipaalam sa kinauukulan ang Republic Act No. 10931 o ang Universal Access to Quality Tertiary Education Act of 2017.

Sa orientation ukol sa RA 10931, ipinaliwanag ni Atty. Carmelita Yadao-Sison, OIC-Executive Director IV ng UniFAST Secretariat, ang tungkol sa Free Higher Education, Free Technical Vocational Education and Training, Tertiary Education Subsidy and Student Loan Program, at iba pa.

Sa gabay ng temang #Free Education Na!, binigyang-diin sa information caravan na, pagkatapos ng ilang mga panukala na hindi umusad sa Kamara at Senado at mahabang mga debate at usapan, naisabatas na ang isang komprehensibong libreng edukasyon sa kolehiyo para sa mga kabataang Pilipino. Niliwanag ng UniFast secretariat ang mga alituntuning sumasaklaw dito at ang mga administratibong mga hakbang na dapat isagawa ng mga State Universities and Colleges (SUC), Local Universities and Colleges (LUC), private higher education institutions, at technical-vocational institutions na kabahagi ng pagpapatupad nito.

Lumahok sa pagtitipon ang mga opisyal ng UniFAST; mga administrador, guro at estudyante mula sa mga State Universities and Colleges, Local Universities and Colleges, private higher education institutions, at technical-vocational institutions sa CALABARZON; mga opisyal at kinatawan ng mga national agencies kabilang ang TESDA, DOLE, DOST, at DSWD; at mga opisyal ng ilang local government units ng Region IV-A.

Dumalo sa pagtitipon sina 5th District of Batangas Congressman Marvey Marino; UniFAST OIC Executive Director IV Atty. Carmelita Yadao-Sison; Region IV-A CALABARZON CHED Regional Director Dr. Emmylou Yanga, Rizal TESDA Provincial Director Elpidio Mamaril, Jr., at Dr. Tirso Ronquillo, Batangas State University President at Philippine Association of State Universities and Colleges President. – Jean Alysa C. Guerra – Batangas Capitol PIO