Higit 800 bags, nakolekta sa Tanauan Blood Olympics

August 2, 2019

Mahigit 800 bags ng dugo ang nakolekta sa idinaos na Blood Olympics ng Batangas Provincial Blood Council, na may temang “Safe Blood for All,” kaugnay ng National Blood Donors Month sa Lungsod ng Tanauan noong ika-31 ng Hulyo 2019.

Naging katuwang sa programa ng Provincial Blood Council ang Pamahalaang Panlungsod ng Tanauan, ABS-CBN Lingkod Kapamilya Foundation, Department of Health, at Philippine Red Cross – Batangas Province.

Mga volunteer workers, miyembro ng Philippine National Police, kawani ng pamahalaang panlungsod at estudyante na mula sa iba’t ibang bayan sa CALABARZON Region ang nag-alay ng dugo sa aktibidad.

Nagbigay ang ABS-CBN, sa pangunguna ng kinatawan nito na si dating Bise Presidente at News Anchor Noli de Castro, ng libreng gupit, libreng dental at eye check up, at livelihood trainings para sa mga nakiisa rito.

Naging aktibo rin sa programa sina Batangas Provincial Health Officer, Dr. Rosvilinda Ozaeta, na kinatawan ni Gov. DoDo Mandanas; Tanauan City Mayor Sweet Halili; Dr. Noel Passion, Assistant Regional Director ng Department of Health – Region 4A; Batangas Provincial Blood Council Chairperson Jhun Magana; at mga kawani ng Red Cross Batangas,Batangas Medical Center, Department of the Interior and Local Government – Batangas, at PNP – Batangas.

Millicent Ramos – Batangas Capitol PIO