March 14, 2019
Isinagawa ang 1st Quarter CALABARZON Regional Development Council (RDC) Full Council Meeting, sa pangunguna ni RDC Region IV-A Chairperson at Batangas Governor DoDo Mandanas, noong ika-14 ng Marso 2019 sa NEDA IV-A Bldg., Brgy. Milagrosa, Calamba City, Laguna.
Isa sa naging adyenda ng pagtitipon, sa ilalim ng Special Committee on Social Development, ang naging paglagda sa Memorandum of Understanding (MOU) for Inter-Agency Convergence to Institutionalize Support for the Implementation of the Provincial Commodity Investment Plan of Batangas. Ikinatawan ni Gov. Mandanas ang pamahalaang panlalawigan sa kasunduan, kung saan katuwang ang Philippine Rural Development Project – CALABARZON Regional Project Coordination Office, Department of Trade and Industry, National Dairy Authority, Philippine Carabao Center, at Land Bank of the Philippines, bukod sa iba pa.
Nakapaloob dito ang pagpapalakas ng produksiyon ng kape, mangga, saging, niyog, dairy cattle, dairy carabao, seaweeds at itlog, na ilan sa mga pangunahing kalakal ng lalawigan, katulong ang iba’t ibang ahensya ng pamahalaan.
Tumayong saksi sa MOU signing ang mga hepe ng provincial government departments na bahagi ng pagbuo ng Provincial Commodity Investment Plan, kabilang sina Provincial Cooperative, Livelihood and Enterprise Development Officer Celia Atienza; Provincial Planning and Development Officer Benjie Bausas; Provincial Agriculturist, Engr. Pablito Balantac; Provincial Engineer Gilbert Gatdula; at, Provincial Veterinarian, Dr. Rommel Marasigan.
Kabilang din sa mga tinalakay ang pag-apruba sa binalangkas na Action Plan ng Tawilis Technical Working Group ng Special Committee on Economic Development, at ang pagkatig sa mungkahing pagpapababa ng toll rates sa Cavite Expressway ng Special Committee on Infrastructure Development. Mon Antonio A. Carag III – Batangas Capitol PIO