Gawad Parangal para sa mga Government Health Offices, Facilities sa Batangas, Iginawad ng Kapitolyo

December 12, 2022

Ang Kalusugan ay isa sa mga pangunahing tinututukan ng Pamahalaang Panlalawigan ng Batangas kung kaya’t isang Gawad Parangal, na kumikilala sa mga City and Municpal Health Offices, Rural Health Units (RHUs), District Hospitals, Health Centers, at iba pang medical facilities sa lalawigan ang idinaos sa Provincial Auditorium, Capitol Compound, Batangas City noong ika-9 ng Disyembre 2022.

Ang pagbibigay ng parangal ay pinangunahan nina Governor Hermilando “DoDo” Mandanas at Vice Governor Jose Antonio Leviste II, kasama si Provincial Health Officer, Dr. Rosvilinda M. Ozaeta, at ang ilang mga kawani ng Provincial Health Office.

Ang rekognisyon na ibinigay ng probinsya ay patunay sa ipinamalas ng bawat mga namumuno sa mga health facilities sa buong probinsya para sa kani-kanilang mahusay na kasanayan sa larangan ng paghahatid ng pangkalusugan o health-related services at pagpapatupad ng mga natatanging proyekto upang mapalakas pa ang antas ng pagtugon sa mga pangangailangang medikal ng mga mamamayan.

Kaugnay rito, sa hanay ng programang Health Governance o E-Knsulta Accreditation, itinanghal bilang Highest Potential in Supporting Health Governance, Financial Risk Protection, and Equity ang mga RHUs ng mga Bayan ng Ibaan, Alitagtag, Balete, San Juan, Mabini, at Lungsod ng Tanauan.

Para sa programang may kinalaman sa Adolescent Health and Development Program, iginawad ang titulong Outstanding Responsive and Adolescent-Friendly Health Facilty for Level 3 sa Alitagtag RHU, Batangas City Health Center II at Lipa City East District Health Center. Ang mga ginawaran naman ng Adolescent Health Responsive Local Government Unit (LGU) Award, para sa Level 2 ay ang Tanauan RHU I, Batangas City RHU 2, Lipa City RHU 2 , Alitagtag RHU, San Pascual RHU, Batangas Medical Center at Lipa City District Hospital. Para pa rin sa Adolescent-related award, iginawad ang Adolescent-Friendly Health Facility Award for Level 1 sa mga RHUs 1, 3, 4, 5, at 6 ng Batangas City, RHUs 1, 3, 4, at 5 ng Lipa City, at Laurel Memorial District Hospital.

Sa linya ng mga programa pagdating sa Health Education and Promotion Unit, ang mga Lungsod ng Calaca at Batangas ang nagwagi ng Outstanding Health Promotion Campaign Thru Social Media, habang Best Rural Health Unit in Promoting Healthy Setting ang Munisipalidad ng Bauan at Lungsod ng Batangas.

Bukod dito, ang San Jose LGBTQ Community at Batangas City ang nakakuha ng Driving Health Equity Award para sa mga programang nakatuon sa Gender and Development. Calaca City Health Office naman ang itinanghal na Best LGU in TB Program Implementation para sa kategorya ng mga programang tumutugon sa National TB Control.

Dagdag pa rito, para sa Vector-borne Disease Prevention and Control Program, isang lungsod at tatlong mga bayan ang hinirang bilang Top Performing LGU, na kinabibilangan ng Lungsod ng Calaca, at mga Bayan ng Balayan, San Jose, at Taysan.

Ilan pa sa mga programang pangkalusugan ang binigyang-pansin sa ginanap na gawad parangal ng lalawigan kabilang ang Voluntary Blood Services Program, na kinilala ang mga bayan ng Alitagtag at Cuenca bilang Best Local Government Unit Support; National Immunization Program, na kinilala ang Taysan RHU, Municalities of Sta. Teresita at San Jose, at Cities of Tanauan, Batangas, at Calaca para sa pagkakaroon ng laging kompletong detalye sa mga ginaganap na aktibidad; at Rabies Prevention and Control Program, kung saan kinilalang Best Performing Animal Bite Treatment Centers ang Tanauan City Health Office, Municipality of Lian, Municipality of Nasugbu, at Municipality of Calatagan.

Kasama rin sa mga pinarangalan ang mga Bayan ng San Luis, Bauan, Malvar, at Balete para sa Best Cold Chain Management; Sta. Teresita RHU, San Jose RHU, Taysan RHU, at Bayan ng Padre Garca bilang Best Performing Field Health Service Infiormation Systems Reporting; Taysan RHU, City of Calaca, at Municipality of Tuy bilang Best Performing LGU in Disaster Risk Reduction and Management for Health; Batangas City bilang Best Peforming LGU on the Promotion of Oral Health Program; Municipality of Mataas na Kahoy at Tanauan City bilang Best Performing LGU in National Aedes-Borne Viral Diseases Prevention and Control Program; at Calaca City Health Office na nakuha ang award na Best Practices on Enivronmental Sanitation.

Dalawang parangal naman, na sakop o nasa ilalim ng Nutrition Services Program, ang ipinagkaloob sa City of Calaca na hinirang bilang Efficient Performing LGU in Managing Nutrition Program at Achievement, Contribution, and Excellence of Initiative Award naman ang iginawad sa Martin Marasigan Memorial District Hospital. Ang Provincial Epidemiology and Survellance Unit ay humirang naman ng apat na LGUs sa larangan ng COVID-19 Response, Prevention, Detection, Isolation, Treatment, and Reintegration (PDITR) Strategy, kung saan outstanding remarks ang nakuha ng mga Lungsod ng Batangas at Lipa at exemplary naman para sa mga Bayan ng Taal at San Jose.

Samantala, ang huling kategorya ng mga programa na tinututukan pagdating sa health-related services and concerns ay ang Responsible Parenthood and Reproductive Health – Family Planning (RPRH-FP) kung saan kinilala ang ilang mga lungsod, munisipalidad, at district hospitals sa lalawigan kabilang ang Municipality of Lian at City of Sto. Tomas bilang LGU with Exemplary Contribution for RPRH Demand Generation and FP Outreach Mission; Calatagan Medicare Hospital bilang Most Responsive and Prompt in Submission of Requisites Facility; Batangas Provincial Hospital bilang Facility with Highest Income Generated in Local Economic Enterprise; Lipa City District Hospital bilang Facility with Exemplary System Innovations during the Pandemic; Batangas Provincial Hospital bilang Facility with the Highest Number of Indigent Patients Served; at City of Calaca bilang Top Performing LGU.

Mon Antonio A. Carag III – Batangas Capitol PIO