February 26, 2018
Bilang pagpupugay sa hindi matawarang dedikasyon at pagmamahal sa kanyang tungkulin, hinirang ng Rotary Club of San Pascual and Rotary International bilang natatanging lingkod bayan at Outstanding Farmer Technician si Ms. Melinda Mendoza, Agriculturist II at Good Agricultural Practices (GAP) Focal Person, mula sa Office of the Provincial Agriculturist ng Lalawigan ng Batangas noong ika-17 ng Pebrero 2018.
Binigyang pagkilala din ng Pamahalaang Panlalawigan ng Batangas si Ms. Mendoza sa Flag Ceremony ng mga kawani ng Kapitolyo noong ika-26 ng Pebrero 2018.
Sa isang panayam, ibinahagi ni Ms. Mendoza na mahigit 26 taon na siya sa serbisyo at madami na rin siyang naging kontribusyon. Nagsimula siya sa paghawak sa mga organisasyon at nagbibigay din ng mga kaalaman sa pamamagitan ng trainings at lectures sa iba’t ibang bayan sa lalawigan ng Batangas. Tinalakay naman niya ang tungkol sa mga programang isinasagawa ng kanilang tanggapan, kabilang ang vegetable production project, corn seed production project, organic agriculture, rice production assistance project, food agricultural practices at seed assistance.
Samantala, pinagtuunan niya ng pansin ang tungkol sa organic farming. Aniya, wala silang chemical na ginagamit sa kanilang mga pataba sapagkat nakalalason ito sa lupa, lalong lalo na sa mga pangunahin nilang pananim tulad ng kamatis, ampalaya, okra, sili at kalabasa. Almira M. Eje – Batangas Capitol PIO