Child Friendly Guidelines, muling pinagtibay sa Lalawigan ng Batangas

August 22, 2019

Isinagawa ng Pamahalaang Panlalawigan ng Batangas ang Provincial Orientation on the Revised Child Friendly Guidelines Audit noong August 19, 2019 sa PCLEDO Livelihood Center, Provincial Capitol, Batangas City.

Ang programang ito ay magkabalikat na ipinatupad at isinusulong ng Provincial Social Welfare and Development Office (PSWDO) at Department of the Interior and Local Government (DILG) na pinamumunuan nina Ms. Jocelyn R. Montalbo, RSW at MS. Katherine Garcia, LGOO II.

Naging pangunahing tagapagsalita sa nasabing oryentasyon si Ms. Florida Radam ng Regional Sub-Committee for the Protection and Welfare of Children.

Layunin ng pagpupulong na maipaliwanag sa mga kalahok ang mga bagong tools and guidelines para makapasa sa Child-Friendly Guidelines Audit at mapag-usapan ang mga programa, plano, at aktibidad ng mga munisipalidad upang makamit ang pangangailangan at magkaroon ng pagkakataon na mahirang bilang presidential awardee para sa Seal of Child-friendly Local Governance.

Malaking puntos umano ang maiidagdag ng nasabing parangal para makamit ng Batangas ang Seal of Good Local Governance na tumitiyak na makapagbibigay sa ating lalawigan ng malaking karangalan.

Ang mga naimbitahang kalahok sa oryentasyon ay ang Municipal Local Government Operations Officers (MLGOO) at Municipal Social Welfare and Development Officer (MSWDO) ng bawat munisipyo sa Lalawigan ng Batangas.

Dumalo rin sa nasabing pagtitipon ang Technical Working Group ng Provincial Council for the Protection of Children (PCPC), na ang mga miyembro ay nagmula sa Provincial Health Office, Provincial Nutrition Committee, Provincial Planning and Development Office, at Department of Education.

Francis Japor – Batangas PIO