August 15, 2017
Patuloy na binabalangkas ng Pamahalaang Panlalawigan ng Batangas ang pagpapalakas ng Telecommunication Infrastructure nito partikular sa larangan ng Internet at Information Technology.
Ito ay matapos ihayag ni Batangas Governor Dodo Mandanas sa pagtitipon ng mga kasapi ng League of Municipalities and Cities ng Batangas kasama ang Liga ng mga Barangay, na dinaluhan ng mga mga Mayor ng iba’t-ibang bayan sa lalawigan kasama ang mga pangunahing opisyal ng kanilang barangay, sa isinagawang Community Mobilization Project ng Philipinne National Police at DILG noong ika- 14 ng Agosto 2017 sa Provincial Auditorium, Captiol Site, Batangas City.
Ayon sa gobernador, ang papapalakas ng communication system, partikular sa cyber space o internet ay napapanahon na sa lalawigan dahil sa isa ang Lalawigan ng Batangas sa mga pangunahing investment and development destinations sa CALABARZON region.
Sa kanyang pahayag, sinabi nito ang panukala sa National Economic Development Authority na pagkakaroon ng Batangas na sariling Telecomm System na hindi saklaw ng tatlong telco giants sa bansa. Ito umano ay nasasaklaw sa saligang batas na nagsasaad ng right to build its own telecom systems para sa mga lokal na pamahalaan.
Sa pagpapalakas ng internet, mabilis umanong maipatutupad ang mga e-business services sa lalawigan, internet based education para sa mga mag-aaral, mabilisang mobilisasyon sa transportasyon at komunikasyon sa pagitan ng mga private business establishments, pagbibigay serbisyo ng pamahalaan tulad ng off site- government services at pagtatayo ng government data storage facilities at, ang pinakamahalaga umano, ang pagkakaroon ng libreng internet sa mga pampublikong lugar.
Sa kasalukuyan isa ang Lalawigan ng Batangas sa kinatatayuan ng vital telecommunication facilities tulad ng under sea fiber optic cable station sa bayan ng Nasugbu. Pinag-aaralan din umano ngayon ang pagtatayo pa ng isang pang katulad na pasilidad sa Calaca. Edwin V. Zabarte/ Batangas Provincial Information Office