Pag-IBIG Fund Batangas, hinihimok mag-impok ang mga miyembrong Batangueño

April 4, 2019

Hinihikayat ng Pag-IBIG Fund ang mga Batangueño na mag-impok sa pamamagitan ng kanilang savings program, na mas malaki ang interest o tubo kumpara sa mga tipikal na naibibigay ng mga banko at financial institutions.

Sa panayam sa B’yaheng Kapitolyo, ang official radio program ng Pamahalaang Panlalawigan ng Batangas, noong ika-3 ng Abril 2019, binigyang-diin ni Ginoong Noel Lagustan, ang Supervising Marketing Specialist ng Pag-ibig Fund Batangas Branch, ang kagandahan nang pag-iipon sa pamamagitan ng Modified Pag-IBIG 2 Program o MP2.

Sa nasabing scheme, ang monthly savings ay mula sa minimum na 500 hanggang 5,000 piso kada buwan, na maaaring bayaran monthly, quarterly o semi-annually, at may maturity period na lima hanggang sampung taon. Bukas ito sa mga aktibong miyembro ng Pag-IBIG, at mga retirees o pensioners. Tax free rin ang savings, government guaranteed kung kaya’t, sakaling magsara ang Pag-IBIG, buo pa ring makukuha ang nailagak na pera, at walang limitasyon sa pag-iimpok.

Sa kasalukuyan, ayon pa rin kay Lagustan, mayroon nang 103,034 Pag-IBIG members sa Batangas Province, na mula sa pribadong sector; gobyerno; at, mga voluntary contributors, kabilang ang mga self-employed, self-paying at mga galing sa informal sectors.

Sa shelter loan, mas maliit ang interest rate sa Pag-IBIG, na 3% per annum, habang sa ibang financial institutions pinakamababang interest ay 5.37%. Mas matagal din ang terms of payment, na maaaring maghulog hanggang 30 taon, at mayroon pang ibang options sa payment terms. Avelene P. Lopez- Batangas Capitol PIO